政情：盧偉國唱龍舟新舊合璧
立法會議員盧偉國向來鍾情中國文化，端午節呢類傳統節日當然好重視，仲全情投入參與。原來多年來喺端午節嘅前幾日，沙田龍舟競賽籌委會都會擇日為龍舟競賽舉行點睛儀式，而盧偉國就負責儀式上恭讀祝文。不過，盧偉國唔係照稿恭讀，而係用「唱龍舟」嘅方式讀出，以延續呢種近乎絕迹嘅文化。
童年時代一見難忘
盧偉國話，佢十多年前擔任沙田龍舟競賽籌委會主席期間，因懂得朗誦兼聲音洪亮，自此接替點睛日恭讀祝文嘅任務，但佢恭讀祝文有別於以往嘅老師傅，選擇以「唱龍舟」嘅方式讀出。佢話童年時代曾見過街頭藝人手持龍舟道具，向商舖高唱吉利嘅歌詞以求金錢打賞，但呢種境況今日實在難得一見，所以佢用另類方式恭讀祝文，係希望「唱龍舟」呢種文化不致為大眾所淡忘。
由於「唱龍舟」同唱南音相似，絕對難唔到有中樂造詣嘅盧偉國。至於祝文嘅內容亦都別樹一格，除咗向屈原致祭外，佢仲加插反映時事嘅內容，今年就將立法會「拉布戰」及經濟民生嘅現象加入祝文之中。除咗恭讀祝文，佢仲會親身做龍舟競賽嘅鼓手，事關佢識奏樂，能夠掌握節奏。