政情：魔童教後生仔 莫要固定伴侶
有份競逐電視牌照嘅香港電視主席王維基（魔童），佢嘅「電視大亨」夢暫時未有聲氣，前日佢就親自影相求網民喺香港電視嘅社交網站專頁「讚好」，目標藉五十萬個「讚好」發動另類「網上公投」，迫使政府盡快發牌。
分享創業經驗 寸盡政府
魔童尋日向有意創業嘅年輕人分享自己多年創業經驗，每當講起遲遲未獲發牌嘅香港電視，魔童都不禁要「單打」政府，好似揶揄自己等咗三年零五個月都未獲發牌，「心路歷練真係未必個個有我咁好韌力」，又話要做成功嘅生意人絕對冇「平衡生活」呢回事，除非去打政府工，明寸暗踩政府真係句句都背脊骨落。
但當魔童提起自己過去多年都係一星期「七乘廿四」咁做，就感慨已經唔記得呢廿年同屋企兩位小朋友去過邊度玩，有時去朋友屋企見到好多一家大細嘅相，都感覺好唔開心，所以勉勵在場嘅年輕人千祈唔好有固定伴侶，因為愈少負擔就愈能夠輕鬆上陣喎。如果係咁，好多成功人士咪唔使旨意結婚？