政情：高永文秒殺靚太
尋日風和日麗，唔少家庭都趁機去吓郊遊享受天倫樂，但食物及衞生局局長高永文就好唔得閒，事關佢由上午開始，一口氣走勻九龍同新界，為幾場活動擔任主禮嘉賓。大熱天時下，高局長着住套厚重嘅西裝周圍騰，都咪話唔辛苦，但佢現身婦協健康月開幕禮時，依然風趣幽默，加埋個招牌笑容，在場女士為之歡呼喝采，令佢變成官場嘅「靚太殺手」。
讚太太做好衞生
身為民望最高局長嘅高永文，唔止有抗熱嘅能耐，仲有好口才。佢致詞時話，健康應由家庭出發，而男士們嘅健康，全靠太太平日喺家中做好「衞生政策」，包括佢太太，咁識講嘢，一眾靚太梗係冧爆喇。高局長又話，好羨慕香港有咁多婦女組織，為女性提供支援服務，唔知幾時至會有類似嘅男性組織喎。
其實高永文上任後都面對好多風波，但佢民望依然高企，或多或少同佢以前嘅政績有關，換句話即係「食老本」，偶一不慎隨時民望下跌，睇嚟佢要醒定啲至得喇。