政情：哪吒「奉旨」違泊？
立法會環境事務委員會尋日舉行特別會議，邀請咗逾百個組織及地區人士出席，討論新界東北、東南及新界北嘅堆填計劃，場面咁熱鬧，大家梗係出盡奇招宣傳啦，好似身兼西貢區議員嘅范國威就幫居民剃頭，而另一西貢區議員方國珊（哪吒）就同埋一大班居民，拉晒巨型橫額要求政府否決擴建堆填區。
巨型橫額鋪滿地
不過，有人向我哋投訴，抗議還抗議，點解會有五架車停泊咗喺行人路嘅呢？據講其中一部仲係哪吒使用嘅座駕添。我哋問過嗰架車嘅司機，佢話知道泊喺度會抄牌，但由於哪吒要開會，所以佢喺外面等候。佢仲話，本來架車係泊喺可泊車嘅地方，方便睇住啲巨型橫額，但就有警察叫佢駛上行人路，讓個位畀傳媒機構停車喎，所以佢咪將架車駛到行人路等候囉。
就現場所見，在場嘅警察又真係冇理會佢哋泊架車喺行人路上，但哪吒啲巨型橫額都已經鋪晒喺地下，依家連架車都駛埋上行人路，相信立法會議員未必有咁犀利呀！