中環出更：廚餘變佳餚陳光明好惜食
珍惜廚餘成為熱潮，潮青名譽參事陳光明（Johnny）都響應，早前去食物回收社企「惜食堂」做咗半日義工，捲起衫袖入熱廚房做雜工，刨瓜皮、洗菜、切蔬果、揸鑊鏟炒麵一腳踢，體驗粒粒皆辛苦滋味。
出身富裕之家嘅Johnny，繼早前參加電台節目《窮富翁大作戰》，親嘗執紙皮、住籠屋滋味，日前又跑去社企「惜食堂」做義工。熱廚房位於柴灣工廠大廈內，唔少人會怕焗怕污糟，反而Johnny就話好鍾意，事關佢從小出入爸爸間工廠，自稱係半個「廠佬」喎。
半個「廠佬」 表演拋鑊
入到廚房，與佢相識多年嘅「惜食堂」創辦人董愛麗（Gigi）親自接待，Johnny二話不說捲起衫袖刨瓜皮、洗菜。轉過頭，見到大廚炒麵炒到香噴噴，佢馬上又走埋爐頭示範兩招「拋鑊」絕技，有板有眼。原來陳爸爸係超級食家，不時請來城中星級大廚到家中煮幾味，耳濡目染下，Johnny都煮得兩味。眨吓眼，一千個午餐飯盒出爐。半日義工功德圓滿，Johnny話充滿正能量，好開心，稍後會呼籲更多朋友及邊青加入義工。
Gigi話，「惜食堂」係社企，除熱心員工外，每天需要約廿個義工幫手，呼籲更多有心人加入，或者慷慨捐助食物。佢又話，曾經收過逾千條魚、過萬隻雞翼、近萬盒月餅等，但因需求龐大，眨眼就煮晒。佢計劃年底喺九龍開設多一個廚房，預計每天可生產多三千個飯盒，等更多老人家享受兩餐溫飽之樂。
卓妮