政情：行會開籠雀「審死官」
近期公眾對行政會議嘅注意多咗，繼有行會成員林奮強繼續放其悠長假期、行會公布因為無議程所以停開一次會議、張震遠辭去所有公職包括行會，然後大家你一言我一語，討論行會嘅組成是否有問題、行會成員嘅申報制度有無改善必要等。究竟喺發生咁多事之後，行會嘅討論質素有無改變呢？
林奮強廢噏 口水多過茶
放緊長假嘅林奮強喺行會裏面最大特點，好多有份開行會嘅人都話，就係口水多過茶，事關身為智庫組織「香港黃金五十」創辦人嘅佢開會最鍾意講學理兼拋數據，可惜當中民情考慮欠奉，政治考慮不足，長篇大論終被視為吹水言論。
畢竟行會開會唔係城市論壇，不是論政而是執政，好多人都唔明白只係論政唔會令個政府運作。林煥光、葉劉淑儀同羅范椒芬喺呢啲時候就可以顯出功架，點解？因為佢哋以前都做過政務官，佢哋以前喺行會甚至港英年代嘅行政局點畀人問到口都啞，佢哋今時今日，都以同一態度，去「審問」出席嘅政府官員。
聽聞三人組一拎起份文件就會問不停口，打爛沙盆問到篤，籠統如政策成效，細緻至落實具體時間表，分幾多個階段推行，三人組都要問一大輪，彷彿單憑白紙黑字嘅文件，絕對不能滿足佢哋嘅求知欲。當然啦，佢哋從前係寫文件嘅人，今日佢哋負責睇文件，就金睛火眼，一睇就知問題隱藏晒喺邊，全部無所遁形。
廖長城如無必要唔出聲
有人偉論滔滔，有人就默默唔出聲，剛辭職嘅張震遠喺會上唔算多發言，據講廖長城就更係沉默，如無必要，佢都唔會開金口。不過無論行會成員開會認真唔認真，行會都畀人一個橡皮圖章嘅印象，因為問題去到行會決定，已經米已成炊，可以改變嘅已經太少。
可能行會嘅議程根本就唔係咁多，今屆行會組成之初，原本話行會會由過往嘅逢星期二開會一個上午，改為全日開會。不過，運作咗幾個月，成員睇通咗個運作方式其實唔係咁誇張，行會好多時開會半日就開完，星期二已經恢復中午約人食飯。