政情：曾鈺成錫啖呵番蔣麗芸
今日係立法會主席曾鈺成六十六歲生日，雖然佢今次唔使再好似去年辯論議席出缺安排咁喺議事廳內度過生日，但佢嘅黨友尋日就好細心咁喺宴會廳搞咗場生日會，同時幫尋日生日嘅蔣麗芸（Ann）慶祝。曾鈺成愛徒李慧琼仲特別訂造一個象徵剪布得米嘅八磅重「鉸剪蛋糕」送畀主席，搞到主席全程尷尬苦笑。
曾鈺成見到個「鉸剪蛋糕」都覺得好得意，又話生日願望係希望食咗把朱古力「鉸剪」後，從此唔使再出動鉸剪剪布。當黨友唱盡中、英文生日歌後，異常風騷嘅曾鈺成更加出人意表咁錫咗阿Ann臉珠一啖，阿Ann就即刻笑到見牙唔見眼，即時忘記晒日前被主席警告同訓話嘅不快事。
蔣：唔知阿嫂點諗呢？
被問到係咪已經同阿Ann言歸於好，曾鈺成就反問：「乜需要咩？」阿Ann都話，佢哋曾經喺開黨團時傾過呢個問題，明白主席對新入立法會嘅黨友會特別嚴厲，所以佢會刨熟啲《議事規則》將勤補拙。至於突然之間畀主席錫一啖係咪好驚喜時，阿Ann就好感觸咁話：「都擔心o架，唔知阿嫂點諗呢？」