政情：黎棟國玩iPhone大驚小怪
依家好多人都用緊智能手機，影相、拍片、睇戲同玩Apps無所不能，好似保安局副局長黎棟國都唔例外，隨身袋住部iPhone。
不過，近年力推新科技打擊罪行嘅黎棟國，原來仍未能完全掌握手機嘅基本功能，例如唔識得用部電話錄音，所以見到記者用電話做錄音訪問感到相當驚訝。
話說尋日立法會保安事務委員會會議結束後，黎棟國回覆本報有關當局跟進「拐子佬」及「堵截雙非孕婦」等問題時，佢就對記者以iPhone錄音感到好驚訝，之後仲請教記者用手機錄音嘅操作方法，期間更掏出自家嘅iPhone活學活用添，真係難以置信。
其實錄音功能係iPhone嘅原始功能，早在第一代手機推出時已經設有，面對時下嘅科技罪案推陳出新，手法要幾複雜有幾複雜，睇嚟黎棟國真係要惡補吓喇！