政情：從政做官 石永泰說不
香港自回歸之後，大律師公會好似變咗從政人士嘅踏腳石，立法會議員梁家傑、律政司司長袁國強等都係歷屆大律師公會華人主席。該會新主席石永泰（Paul）尋日接受電台訪問時，被主持問到會唔會行政黨從政呢條路，Paul就斬釘截鐵say「no」，話組黨或做官都唔係佢杯茶。
內地人文明咗 冀港人接受
阿Paul認為，做大律師呢行勝在夠獨立，唔需要依附某一個商業個體、政府機構同大財團，可以冇壓力咁表述立場。但如果大律師從政，好多時言論會受到黨派立場影響，唔能夠講出真正諗嘅嘢。佢仲話，好多時見到大律師從政之後，講嘢會過咗火位添！佢話一心為公會做事，做完主席就告一段落，亦冇諗過做律政司司長，雖然佢覺得司長呢份工好有趣，但要平衡法律以外嘅考慮，就未必符合佢嘅性格喇。
對於有人將中港矛盾解說成兩地文化差異，港人應予以包容，主持問Paul點睇，佢就強調文化同文明係兩回事，佢舉例話：「你夠唔夠膽喺文化交流大會上講，我哋嘅文化係隨地吐痰，踎喺街邊唔排隊？」不過，阿Paul話依家內地人已經文明咗，希望港人慢慢接受佢哋轉變喎。