政情：觀塘版幻彩驚見光死
原以為港府官員或公職任命先會擔心「見光死」，點知連區議會討論一億元「社區重點項目」都驚槍打出頭鳥。當局早前宣布將本月底提交項目建議嘅死線放寬，點知間接提供空間畀建制派鑽空子，據聞建制派佔多數嘅觀塘區議會，為免觀塘海濱長廊美化大計被反對陣營批評到一文不值，索性押後討論項目，擬將有關建議收埋到最後一刻先至曝光。
施政報告提出向十八區區議會撥款廿億元做「社區重點項目」，本報早前講過泛民主派擔心項目會變成「蛇齋餅糉」式活動，於是打算用「拉布」作為「秘密武器」，搞到當局擔心項目有「爛尾」危機。不過，「你有張良計，我有過牆梯」，有傳觀塘區議會見到依家泛政治化嘅政治氣候，都唔想提出嘅項目建議咁易「中伏」，所以打算將項目討論拖得就拖。
有知情人士透露，其實觀塘區議會內部曾提出多個項目建議，最矚目就係觀塘海濱長廊美化計劃，會喺啟德郵輪碼頭與觀塘海濱長廊之間嘅海中心打造觀塘版「幻彩詠香江」。不過，有關項目一來規模浩瀚，二來擔心變成「深井燒鵝」擺設品翻版，或會遭受外界狂插，成為眾矢之的，所以該會並無打算搶住喺本月底通過敲定項目，此舉不外乎係以時間換取空間，旨在摸清形勢謀定而後動。
拖延無着數 撥款恐爛尾
觀塘區議會擔心「槍打出頭鳥」，相反中西區區議會就手起刀落，喺較早時間已經敲定建議項目，期望將一億元撥款袋袋平安。消息指，中西區區議會早前挑選三個項目作公開諮詢，包括美化西區副食品批發市場嘅對出臨海地段，最終呢個建議以壓倒性近八成支持採納做重點項目。
話時話，其實區議會拖延討論項目未必有着數，正如我哋早前報道一樣，如果將討論拖得太久，萬一未能趕及將項目建議喺暑假前提供畀當局向立法會申請撥款，最終搞到項目爛尾，一億元撥款泡湯，到時區議會都唔知點同居民交代喇。