中環出更：黃浩鈞杜拜飲駱駝奶茶
餐飲聯業協會會長黃家和公子黃浩鈞（Howie）同太太Iris去年結婚，未趕及度蜜月已宣布懷有龍女。轉眼間愛女Olive已半歲大，Howie上月就同太太遊中東杜拜七日補度蜜月，期間咖啡奶茶癮起，不忘歎番杯當地嘅特色駱駝奶茶、玫瑰咖啡，但佢始終覺得港式奶茶最好飲。
杜拜出咗名係紙醉金迷嘅地方，Howie夫婦都係首次到訪，見識當地奢華一面之餘，有日更登上一艘古老小艇吹海風歎咖啡，體驗昔日漁民生活。佢話由於杜拜地域乾燥，難以栽種植物，只盛產蜜棗，貧困嘅漁民喺小艇上惟有以蜜棗及咖啡維生。佢話呢種咖啡以玫瑰水沖泡，花香餘韻無窮，佐以香甜蜜棗，別有一番風味。
親海豚 共暢泳
上岸後，Howie試埋以駱駝奶沖泡嘅奶茶，奶騷味頗重，都係港式比較對胃喇。呢次旅程佢哋選擇住喺七星級嘅阿特蘭蒂斯酒店（Atlantis Resort），內裏有個「大魚缸」供遊客觀賞人工海洋生態，Howie難得與海豚一齊暢泳，期間仲忍唔住親親海豚添！
卓妮