中環出更：建制派北上考察勁蝦碌
新一屆立法會上任大半年都未試過衝出香港考察，但一班建制派議員就先飲頭啖湯，尋日開始一連兩日到深圳前海、南沙新區等地視察。卓妮都趁此機會去湊吓熱鬧，發現班議員好似去度假咁款，而且一出發後就接連發生「蝦碌」事件，認真出師不利。
三十八名考察議員當中，大部分都先到立法會大樓集合，然後坐大巴經深圳灣口岸進入深圳，再到前海。原本安排萬無一失，點知有內地官員擺烏龍帶錯路，搞到車隊遲到三十多分鐘。當卓妮見到班議員魚貫落車時，眾生相乜都出晒來，有部分議員衣着好隨意，運動外套同Ｔ恤隨處可見，好彩未見有人着短褲啫！
大輝「飛奶」彈到李慧琼
至於自行到前海會合大隊嘅三位議員，包括內務委員會主席梁君彥同鄉議局主席劉皇發等，原來考察前後都各有各忙。梁君彥事前要到深圳大鵬灣致祭已故親人後直接到前海。至於帶埋老婆出席嘅發叔，就打算今日考察完成後趕返港入馬場，所以帶備多一套便服更換，睇嚟兩日考察真係搞到佢啲時間好緊迫喎。
其後一眾議員先後俯瞰前海全景及到「深港現代服務業合作區」展示廳，齊齊戴住３Ｄ眼鏡睇前海介紹影片，但有人戴咗一陣就嗌頭暈。之後呢班鴨仔傍晚轉到南沙，由中聯辦主任張曉明請宴款侍，但晚宴期間又有「蝦碌」嘢，工業界林大輝唔小心打瀉枱面杯酸奶兼「飛奶」，彈到過對面李慧琼身上，認真失威。
張曉明尋日連走幾場，早上先出席一個喪禮，然後到西貢參加植樹日活動，跟住傍晚再到南沙同建制派議員共進晚餐。
建制派「鴨仔團」今日會轉到深圳，重頭戲係今早同全國人大法律委員會主任喬曉陽座談，之後同國務院港澳辦主任王光亞食飯，唔知班議員今日會唔會執正啲呢？
卓妮