單打獨鬥始終難敵雙拳四手，尤其係從政嘅，個個都想泊個好碼頭，可以幫自己遮風擋雨，發揮協同效應。一直有意轉戰直選嘅廠商會立法會代表林大輝，早前放風話想入政黨，但大家未知佢情歸何處，我哋收到最新消息，原來大輝靜靜雞喺一月初已經加入沙田政團公民力量，正式成為「公記」一分子，睇怕大輝以後參選，好可能都用公記牌頭出戰。
我哋去年已經率先報道大輝同公記眉來眼去，估唔到事隔未夠一年，兩者已經拉埋天窗。公記常委會主席韋國洪證實，大輝的確係加入咗公民力量，但其他嘅事就唔清楚喇。不過，據聞大輝早喺一月獲公記常委會批准加入，仲講明會出錢出力支持公記喎。我哋尋日問大輝，佢亦話好開心加入公記，今後會繼續凝聚地區力量。
唔怪得之早前沙田區議會田心選區補選，大輝身在北京都要專誠飛返香港，幫公記潘國山企足全日拉票啦，原來係幫自己人拉票，都算唔話得。
雖然公記只係地區嘅政團，但係有能力站穩喺沙田咁多年，近年更將勢力延伸到將軍澳，實力絕對不容忽視，大輝今次成功泊到個靚碼頭，下一個目標好大機會係新界東直選！