中環出更：鄭汝樺退休好充實
前運輸及房屋局局長鄭汝樺（Eva）去年六月底離開政府後，鮮有喺公開場合露面，尋日佢出席尖沙咀聖安德烈堂擴建籌款活動時，自言同聖安德烈堂好有淵源，原來佢細個都係返呢間教會，仲認識咗依家嘅老公，之後又大談退休生活好充實，依家每月都去一次旅行，下一個目標仲打算去以色列添！
打網球乒乓球寫書法
正在擴建嘅尖沙咀聖安德烈堂稍後會舉行籌款晚會，Eva都有出席以示支持。Eva自言退休生活幾好，一星期七日嘅生活都好充實，閒時打網球、打乒乓球、寫書法等興趣都有，加上佢本身係教徒，所以有參加同帶領查經班。此外，Eva一向有做開啟蒙導師工作，而且早於九十年代初嘅華東水災時已經開始，對象主要係內地高中以上嘅學生，所以一直目睹內地好多變化。
曾為前高官嘅Eva，一談及退休生活就侃侃而談，但當問及現屆政府施政同菜園村路權風波時，就變得非常謹慎。Eva話，依家已經退休，唔想對現屆政府指指點點，其後被問及菜園村路權風波時，Eva一面話政府已經發咗聲明，叫大家睇吓，另一方面又叫大家去問番鄉議局主席劉皇發，呢啲咪係不在其位，不謀其政囉！
卓妮