中環出更：嚴迅奇獲頒港大名譽博士
香港大學尋日頒授名譽博士學位畀六位傑出人士，國際知名建築師嚴迅奇（Rocco）獲頒名譽社會科學博士。畢業自港大建築系嘅Rocco話，獲得母校認同，高興之餘亦相當意外，事關建築師向來受外界批評嘅多、稱讚嘅少，好似石屎森林、圍牆效應等負面字眼，往往同建築師扯上關係。Rocco話，其實建築師唔易做，業界已經好努力咁協助社會解決建築結構上嘅問題。
Rocco從事建築界三十四年，喺海內外均獲獎無數，本港著名地標ifc、金鐘新政府總部「門常開」等唔少設計都係出自佢手筆。對於有市民批評「門常開」風水差，Rocco笑言，建築師係唔會以風水作為設計嘅考慮條件，佢仲透露，呢個設計其實好戲在後頭，等到海濱長廊落成，「門常開」就自會發揮佢嘅作用喇！
Rocco筆下傑作無數，有邊件令佢印象最深刻？佢話係年前於德國柏林當代文化節中獲獎嘅「竹亭」，皆因畀佢嘅創作空間最大，可以發揮超現實嘅想像力。嚟緊佢將會埋首設計中文大學於深圳興建嘅新校園，將以綠化為主題，冀望為學生締造濃厚嘅學習氣氛。
「敦煌的女兒」亦受祝賀
同獲名譽社會科學博士嘅仲有前復旦大學校長王生洪，以及有「敦煌的女兒」之稱嘅敦煌研究院院長樊錦詩。身兼港大校務委員會委員嘅新世界發展執行董事紀文鳳爭住上前恭喜樊錦詩，話對方係佢偶像。紀文鳳話，自己好鍾意敦煌，曾到訪三次，下年會再去，事關莫高窟遊客中心明年五月就落成，屆時展出數碼化嘅洞窟球幕電影，佢要先睹為快喎。同場仲有機械工程講座教授米耀榮獲頒名譽科學博士，著名訴訟律師余叔韶獲頒名譽法學博士等。
卓妮