政情：田二少煩惱一大籮
新民黨田北辰（田二少）當選立法會議員以來，都算係活躍嘅新丁，雖然博得好多曝光機會，但其實佢最近都煩惱一籮籮，其中一宗就係佢嘅服裝品牌喺內地被人告侵權。田二少坦言呢件事比商舖加租更煩，因為呢單案件已經拖咗好一段時間，依家仲隨時會敗訴喎。當問及係咪會運用港區全國人大代表平台反映意見，佢就話處理呢件私事要好小心。
唔捨得女兒出嫁
至於田二少另一單煩事就係地區助理轉不停。有地區消息話，田二少一向注重地區工作，自不然對於各項地區議題好上心，有部分助理疑似做到頂唔順，選擇辭工走人。我哋曾經致電田二少求證，但直至截稿前都未獲回覆。
雖然有咁多煩惱，但田二少就喺農曆新年同老婆仔女去峇里島旅行，佢笑言唔使睇文件，日日飲飲食食好開心。不過，講到兩個女今年分別會喺五、六月出嫁時，就直呼唔捨得，所以今次一家人去旅行認真難得喎。至於係咪恨抱孫，田二少話之前望到頸都長，依家兩個都快嫁，或者代表抱孫機會大咗。