前教育局局長孫明揚退休養好身體後，經常拖埋太太孫鍾小芬現身公開活動，日前佢哋齊齊着唐裝衫現身一個名人婚禮，孫公左邊心口仲掛咗枚好特別嘅玉。孫太話，枚玉係當年中國國貨公司結業清貨時買嘅，後來佢發揮創意，加多幾枚細玉石襯托吓，仲笑言老公着唐裝加啲飾物，會更加有型喎！見到孫公精神奕奕，孫太話並非湯水嘅功勞，主要係靠食得清淡，加上勤做運動同多休息，固本培元。新春期間佢哋會留港度歲，仲預祝大家身體健康，財源廣進！
