政情：農場觀光想摸BB 母駝怒睥嚇窒EQ
立法會議員葛珮帆（EQ）啱啱喺上周末去咗中東阿布扎比參加第二屆聯合國世界信息峰會，期間忙裏偷閒周圍去觀光。EQ話，佢參觀過專養駱駝嘅農場，好開心睇到兩隻啱啱出世冇耐嘅駱駝BB，當佢想上前摸吓佢哋毛茸茸嘅背脊時，駱駝BB突然露出驚慌表情，駱駝BB嘅媽媽即時用超級兇狠嘅目光怒睥佢，搞到佢即刻縮手唔敢摸，估唔到EQ敢摸鯊魚，但唔敢摸駱駝BB。
港揚威「IT界奧斯卡」
EQ之後又去咗中東地區最大嘅清真寺參觀，由於寺內嚴格規定女士皮膚同頭髮都唔可以外露，所以寺方準備咗傳統黑色長袍 （Abaya），等啲女士包好個身再入內參觀。EQ話，第一次着Abaya唔係好習慣，個頭巾仲成日被風吹走，佢惟有用手撳實喎。
其實EQ今次係要帶本港代表團出席有「IT界奧斯卡」之稱嘅世界信息峰會，事關香港區作品喺本屆賽事中破紀錄奪得三個大獎及終極大獎。EQ話，希望獎項可以喚醒港府多啲關注中小企喺科技行業嘅發展，包括檢討中小企創新科技發展基金嘅申請手續，以及幫手開拓更多外國市場。