政情：小肥張淨識硬銷 高永文氹長者好耍家
工聯會連續三日宴請獨居長者食團年飯，尋日煞科請到食物及衞生局局長高永文同勞工及福利局局長張建宗（小肥張）出席。兩位局長同場做騷，小肥張就淨係識硬銷長者政策，但高永文就使盡渾身解數，臨場幫長者睇症之餘，仲用潮州話冧長者，氹到個個老人家四萬咁口，仲爭住同佢握手，呢場局長比試真係高下立見。
小肥張同高永文嘅「比武」由致辭揭幕，小肥張力銷長者政策，講完長者生活津貼又講長者乘車優惠，可惜班長者聽完都冇咩反應。至於高永文一開口就「沙冧」話近排好忙，但一見到長者就覺得好溫暖，又叫長者天氣凍時着多啲衫，就好似孝順仔同父母傾偈咁。
幫睇病又講潮州話
到後來兩人分開去各圍枱同老人家傾偈時，高永文就張張枱都使出唔同招數，又幫啲手痛嘅老人家睇吓雙手，又用潮州話拉近距離；去到東涌街坊圍枱就講吓東涌邊間餐廳啲嘢好食，去到觀塘街坊圍枱又讚工聯會立法會議員陳婉嫻努力爭取聯合醫院擴建，完全同老人家打成一片。
之前最低工資、長者生活津貼等搞到小肥張同嫻姐有牙齒印，尋日兩人都冇咩交流，反而嫻姐同高永文就雞啄唔斷，睇嚟小肥張要搵高永文教番兩招先得喇。