政情：星爺聲東擊西劍插長毛
公屋輪候人士數目已累積至廿一萬，呢班市民望穿秋水都係等上樓，就連金融界立法會議員吳亮星（星爺）都戥呢班基層市民唔抵，近日喺立法會提出口頭質詢狙擊濫用公屋嘅住戶。不過，最耐人尋味係星爺不點名提到某居住公屋嘅人，多年來月入逾七、八萬元仍霸佔公屋，矛頭直指社民連主席「長毛」梁國雄，星爺呢招「聲東擊西」認真高招，果然薑係愈老愈辣！
港府開始「全民搵地」嘅工作，其中一招係房屋署會加強取締濫用公屋戶，預料加埋租戶自願遷出，每年平均可「回收」約七千多個單位。星爺睇準呢個議題遲早會發酵，於是提口頭質詢並援引數字關注濫用公屋歪風，然後話鋒一轉提到部分超越受助條件上限人士仍佔住公屋，更甚係丟空單位或出租單位牟利。
以資產未「超標」霸屋
隨後星爺講到戲肉的時候，更不點名說：「某居住公屋人士屬中高薪族，多年來月入逾七、八萬元，以資產仍未『超標』為由佔住以公帑資助嘅房屋，對大量苦候公屋人士造成不公喎。」
星爺呢招「項莊舞劍，意在沛公」認真高招，雖然名義上冇開名，但實在同點名批評冇乜分別，因為眾所周知，長毛做咗立法會議員多年，佢都仲係住緊公屋，加上佢做議員嘅人工至少有八萬元，加埋津貼逾十萬元，絕對係同星爺提及嘅公屋霸王特徵非常脗合。
長毛指有交雙倍租金
事實上，長毛嘅入住公屋資格耐唔耐就被人翻舊帳，長毛上個月中仲承認政府開始出招，派人審查佢個銀行戶口，又上門家訪。當然長毛繼續死撐話冇濫用公屋，又話咁多年來一直有交雙倍租金，自稱成副身家都只得九萬元，有排都未超過資產上限，但其實佢只係將每月大部分嘅錢轉畀社民連。
星爺突然狙擊公屋富戶，睇怕有關方面勢必會加多兩錢肉緊跟進事件，睇怕長毛短期內都有排頭痕同麻煩喇。有人笑言，長毛平時鬧人鬧得多，相信好耐冇被人咁樣正面挑戰過，今次認真係「剃人頭者，人亦剃其頭」。