中環出更：鄭信恩歷沙士長一智
十年人事幾番新，曾經轟動全城嘅○三年沙士事件亦已事隔十年，回想起當年醫護人員捨己為人、無私奉獻嘅精神，市民無不肅然起敬。卓妮日前遇到當年每逢下午四點半鐘，就會準時喺電視幕前代表醫管局向公眾交代最新疫情嘅靚女醫生鄭信恩（Beatrice），當時佢一個人興致勃勃喺灣仔一間店舖內辦年貨，搜羅精美揮春、掛飾布置家居。
「活在當下 珍惜一切」
呢位當年嘅「醫管局之花」，依家身份已經三級跳，成為大埔那打素醫院及大埔醫院嘅行政總監，任重道遠。Beatrice好感觸話，沙士事件眨眼間就過咗十年，當中發生嘅事，至今依然歷歷在目。佢仲話，從件事中最寶貴嘅得着，係領悟到積極嘅人生觀，懂得「活在當下，珍惜一切」。蛇年就快到，鄭信恩話想借機會同全港市民拜個早年，祝願大家喺蛇年身體健康！
卓妮