中環出更：百年東華段段名人軼事
已有一百四十幾年歷史嘅東華三院，最近出咗本《東華情深繫香港》新書，回顧百年來與港人甘苦與共嘅珍貴片段，其中以行政會議成員張震遠（Barry）與父親張寒松嘅一段東華情最矚目。東華尋日舉行新書發布會，運輸及房屋局局長張炳良、科技大學經濟系教授雷鼎鳴亦現身，原來佢哋係東華三院第三小學（東華三院李賜豪小學前身）嘅同班同學，諗起當年校園往事，十分好玩。
促成這本書出版嘅東華主席陳文綺慧（Viola）話，佢未上任前就籌備出版，過程艱辛又緊張，好彩多得東華手足及各界好友幫手，由訪談書中主人翁到出書，只用咗半年時間，認真唔簡單。
蔣震高錕都有受惠
書中提及六十幾年前，東華接濟因內戰來港嘅數以千計難民，其中包括Barry父親張寒松。佢與同袍曾經喺摩星嶺殘破嘅軍營，接受東華每日兩餐接濟，書中仲擺放一張Barry與父親嘅珍貴合照，兩父子着得官仔骨骨，好有軍人風範。書中引述Barry話，父親逃難來港時佢仲未出世，但對東華救助難民一事略知一二。書中又提到，當年食過東華愛心飯嘅，仲有著名工業家蔣震添！
諾貝爾物理學獎得主高錕，其夫人黃美芸亦有捧場，佢話高錕定期接受東華專為腦退化症長者而設嘅「智圓全」服務，由初時嘅唔合作到依家玩得好開心，仲盛讚中心嘅伙食好好味添。
卓妮又見到前全國政協雲大棉長子雲維熹，原來佢曾經做過東華總理，Viola盛讚佢對東華一直好支持。
卓妮