污水煲糖水 食完屙到腳軟
【本報訊】「我飲完碗糖水屙咗兩次呀！」有居民用污水煲糖水飲用後，始驚覺食水受污染，當晚兩度肚瀉屙到腳軟，有居民洗澡時「中招」，結果成身臭足全晚。受影響的居民狠批水務署塞責，坦言：「冇飯食！冇涼沖！下下出去食唔使錢咩？」居民惟有各出奇謀，有人到泳池及租賓館洗澡，有人則往超市購買蒸餾水應急。
「沖完涼臭足全晚」
居於安麗樓的住客陳先生稱，其母前晚煲糖水時未發現食水有異，但他其後飲用時已覺有怪味，但他不以為意飲完整碗，其後開水喉時驚見泥黃色食水，心感不妙，當晚即連屙兩次，並說：「我諗都係關啲水事啦！」他又指，曾多番致電不同部門，惟全部推卸責任，怒斥：「我一定要攞番個公道！」安麗樓互委會主席周俊華則指，其子洗澡期間，食水忽然變黑臭，他憶述：「佢即刻大叫！之後成身臭足全晚！」同樓另一住客陳先生亦指其妻子用了污水煮湯丸，結果「成煲都要倒晒」。濾水器亦未能過濾污水，住客江先生稱：「成個濾水芯變成深灰色！成家都要租賓館沖涼！」同座的林先生則指一家三口生活大受影響，「冇飯食冇涼沖！都係水務署啦！依家成堆衫冇得洗！」