新年本應有新氣象，可惜對於港產官僚嚟講，年年如是，年年混帳，簡直死性不改。功夫茶講緊乜嘢？咪就係政府部門失職囉，數十年如一日，永不知錯，永無改善，新氣象就無嘞，新混帳就大把！
嗱，政府部門新混帳真係多到罄竹難書o架。好似過去一年咁，本報投訴版共接獲逾三萬宗投訴，即係平均每日接近一百宗，香港有乜可能唔變怨氣之都、遊行之都吖！人哋話新年勝舊年，港產官僚年年勝舊年嘅唔係效率，唔係表現，而係官僚作風及投訴數字，咁搞法，市民想唔上街都唔得喇。
即係咁，投訴聲中一歲除，喺呢三萬宗投訴裏面都唔係完全無新氣象嘅，政府部門失職失當嘅個案五花八門，無奇不有，鑊鑊新鮮鑊鑊甘。好似近月嘅城中熱話水貨客擾民問題咁吖，本報曾經多次率先直擊報道，引起社會廣泛關注，食環署等執法部門居然置若罔聞，結果一場「光復上水站」運動洶湧爆發，當局先至知驚補鑊，急急出嚟收拾殘局。
又好似過去一年鬧得沸沸騰騰嘅僭建同劏房亂象咁，本報憑讀者提供嘅線索，接連踢爆有人用新界棄耕農地僭建劏房，揭露豬欄劏房、雞舍劏房等社會光怪陸離現象，令屋宇署等部門執法不嚴監管不力嘅失職陋習無所遁形。所以話啫，如果食環署一類懶蟲部門肯積極跟進本報投訴版嘅個案，就唔使喺投訴排行榜年年名列前茅，年年出醜啦。
講到呢度，功夫茶真係要讚一讚本報投訴版，成立三十六年嚟一直為民請命，監督政府，連申訴專員公署都經常根據本報嘅報道嚟調查部門失職，唔到你唔服。你知啦，政府部門懶散失職，數十年如一日，如果唔係正義傳媒發揮第四權嘅威力，小市民真係有冤無路訴o架，到時咯喎，投訴政府部門嘅數字肯定年年破紀錄，一年三十萬宗都有之呀！
咁講啦，新年新希望，如果政府唔想市民年年失望繼而絕望嘅話，唔該日日拜讀本報投訴版，按圖索驥捉拿庸懶官員，乜嘢滲水辦失職、乜嘢醫管局塞責、乜嘢屋宇署失魂，一一無所遁形。特首梁振英咪話「民生無小事」嘅，家陣就係港府攞出實際行動嘅時候嘞，正如學者話齋，咪以為部門投訴係小事，唔去疏導，積積埋埋，民怨隨時爆煲o架！
一句講晒，部門混帳不絕，庸官無可饒恕。港產官僚記住，你哋嘅失職陋習不除，本報投訴版就會繼續為民發聲，無情揭露，如果新一年唔想再榮登投訴排行榜，唔該好自為之喇！