自從前高官鄺其志（神童志）去年涉嫌喺馬會會所發生「水戰」風波後，罕有地被馬會公開張貼告示，禁止出入馬會會所及暫停會籍資格一年，最近仲確定被取消遴選會員（Voting Member）資格。相信大家知道只有二百個名額嘅遴選會員好尊貴，最近亦有唔少城中名人都躋身遴選會員，但邊個取代咗神童志個位？當事人個個都摸不着頭腦。
按馬會規矩，遴選會員唔係一批批好似換屆咁換，而係有人退出，就有人遞補，正所謂「一個蘿蔔一個坑」。其中規定超過七十歲就一定要出局，所以換人係好平常嘅事，好似東方海外嘅董建成就因為年屆七十歲而退出，而新加入嘅就包括滙豐一姐馮婉眉、金融界立法會議員吳亮星、全國政協委員盧文端及「快勞夾大王」杜振源等名人，但新入場嘅當事人就唔會知道自己係填補邊個嘅空缺。
我哋問過吳亮星同盧文端，佢哋都話係幾個月前獲通知做馬會遴選會員，而杜振源就係十二月至知，冇人知邊個係神童志嘅「接班人」。想做遴選會員有咩條件？熟悉馬會運作嘅好友話，梗係要熱愛賽馬同對馬會有貢獻啦，仲要寫信去推薦添呀！