唐宮受查十月英年投訴屋署

揚言欲加幅牆「還原」

唐英年昨指九龍塘約道大宅地庫僭建自去年二月被揭至今，屋宇署多次往大宅地庫鑽採樣本，又將地庫裝修拆掉，「剝到去鋼筋」調查，近日更獲署方通知「一粒磚都唔郁得」，他笑稱不知署方調查「做得咁深入」，連他所委託的專家小組亦不明所以，只知署方已將僭建「拆晒所有裝修」至「還原咁滯」，「所以我要好感謝佢哋（屋宇署）用公帑去幫我做呢啲嘢（還原僭建）」，期望署方未來可「一視同仁」深入調查。對於有指署方在處理唐宅及特首梁振英山頂大宅僭建中有雙重標準之嫌，唐指自己近月外遊不諳情況拒評論，但他揚言今日去信屋宇署申請「起一幅磚牆封住佢」，稱若不獲批「會覺得好奇怪，點解我起道磚牆就唔可以接受呢？」

昔日因僭建被對手利用成為致命一擊，唐英年坦言被攻擊一刻亦估計梁「你梗係無（僭建）啦！」對方後來亦被揭有僭建，他驚訝說：「嘩！咁都得？」形容情形可笑。對於梁振英一再強調梁宅僭建「只是疏忽」不涉誠信問題，唐英年說：「如果咁樣係疏忽嘅話呢，將來施政就千祈唔好疏忽喇！」他拒評梁是否有攻擊對方騙選票，但指「既然佢（梁振英）自己都有僭建而批評我個僭建呢，我覺得咁嘅做法係唔公道嘅，所以我相信每一個香港人眼睛都係雪亮嘅！」唐選舉辯論時一招「同歸於盡」大爆行政會議內幕，結果終於敗選。昨日再被問到指控是否屬實不置可否，僅稱選舉已過大家向前看。被問到沒被選上會否感慶幸，他斬釘截鐵一句「有！」，唐直言「塞翁失馬焉知非福」。

梁宅 梁振英山頂大宅曾有三百多呎僭建物，為他帶來不少煩惱。（資料圖片）

唐宮 屋宇署調查唐英年大宅僭建已有十個月，至今未有結論。

特首梁振英上場半年，「倒梁」浪潮不斷，唐昨就指近日有「多萬人」上街遊行，形容目前香港情況混亂，但他指出政府有不足乃屬正常，而上屆政府推行環保不力他亦有責。「如果我選咗做特首，可能我面對更多彈劾，更多遊行，更多批評都未定，但最緊要都係做好實事，令市民對你有信心囉！」

放大圖片	梁振英	透過泳池底的僭建地庫天窗，可見地庫內搭了棚架，天窗邊緣的石屎亦顯得崩爛。（陳德賢攝）

拒答是否捲土重來

對於有指國民教育、東北發展計劃等「前朝炸彈」相繼爆發阻梁施政，唐就指不應諉過前朝，直言新政府有權更改前朝政策，而梁上場後亦有推翻前朝政策。他不揣測梁是否能履行五年任期，但期望梁於施政報告中能交代民生政策及施政藍圖，以及普選進程。

唐昨將普選掛在口邊，深信中央會讓港落實普選，更呼籲梁「唔好諗住去怪邊個，而係你自己做好向中央爭取真普選的工作先」。至於他未來去向如何，會否加入政黨，以致會否捲土重來選特首，唐僅稱自己要細思去向，處理家中僭建及「久違」的家族生意，未有正面回應。但他表示，希望可以在不同位置繼續服務市民，惟不欲「今屆政府覺得我喺度要挾緊佢，因為我到底喺政府做咗九年幾，我既有經驗，亦都喺政府嘅時候同公務員合作無間。」