政情：廖潔明做主持講碎屍案
過往啲紀律部隊人員退休或離職後想繼續做嘢，一般都係從事番與保安有關嘅工作，高層嘅就轉投地產商打工，近年就多咗兩條出路，其一係投身「熱廚房」做政治問責官員，好似前任保安局局長李少光、現任局長黎棟國，以及現任保安局副局李家超同政助劉富生等，另一條路係乜？咪就係投身娛樂圈囉！
繼廉政公署執行處前副處長徐家傑，最近喺電影中客串扮番廉署阿Sir，警務督察協會前主席廖潔明嚟緊亦會擔任某電視台嘅節目主持，變身碎屍案專家，為觀眾講解香港歷年來發生過嘅多宗轟動碎屍案。
廖潔明有份主持嘅節目，將會介紹嘅轟動大案，包括「康怡花園烹夫案」、「Hello Kitty頭藏屍案」、「援交少女碎屍案」等，單單都觸目驚心！廖Sir透露，佢會聯同另外幾位節目主持，向觀眾解構警方喺調查呢幾單大案時遇到乜嘢困難、如何抽絲剝繭、最終成功破案及緝兇嘅關鍵等。
廖潔明早前以新工作須保持政治中立為理由退出新民黨，問佢點解講碎屍案都要政治中立，佢就話，其實今次主持節目只係兼職，嚟緊份正職話仲未公布得住喎。