政情：報名人大冇帶近照譚惠珠老貓燒鬚
港區全國人大代表換屆選舉尋日開始接受報名，身兼副團長嘅港區人大譚惠珠與行政會議成員羅范椒芬（Fanny）一同報名參選，但經驗豐富嘅珠姐「老貓燒鬚」，冇帶到近照到場，事後要向有關方面補交。至於律師杜偉強就出動助選團陪同報名參選，其中一個女助選團成員特別靚女，唔知呢個係咪佢嘅秘密武器呢？
尋日上午約十點鐘，珠姐同Fanny「孖公仔」報名參選人大，珠姐遞交表格時出現少少阻滯，因為佢從工作人員口中得知要提交近照。查實珠姐事前都做足功課睇過份提名表，冇話到要提供相片，但因應呢個情況，珠姐都主動建議該名工作人員發電郵提醒吓其他人帶近照。如果珠姐過去參選冇甩轆嘅話，莫非報名要求更改咗？
李少光搵舊同袍提名
首度參選嘅杜偉強喺太太同十多名助選團陪同下報名參選，佢自爆取得一百個提名，當中全國人大常委范徐麗泰、中華總商會前會長蔡冠深同珠姐等，又希望今次競選做到一百分。
至於前保安局局長李少光，雖然佢未有現身，但派出舊夥計到來領取報名表，據聞佢已經開始搵啲紀律部隊前同事提名支持，足以證明光哥本身幾念舊情。