政情：吳克儉「教精」青年人
政府尋日喺柴灣青年廣場搞咗個青年高峰會議，特首梁振英同多名局長都有出席，由於參與嘅青年要喺三個星期前預先參加工作坊先畀入場，所以冇咩「滋事分子」潛到入去，令成個高峰會火花全無，一眾高官輪流廢噏。其中教育局局長吳克儉，再次以佢嘅「清爽」髮型搞爛gag，建議青年人可以針對香港人口老化，學吓點樣幫啲冇乜頭髮嘅長者「飛髮」致富，真係畀佢吹脹。
話說有與會者喺會上指出，依家嘅香港年輕人，好似淨係為商業社會服務，質疑教育嘅真諦係咩？吳克儉承認本港年輕人出路比較狹窄，但強調「行行出狀元」，例如佢之前探訪中學，知道有成績一般嘅學生，打算從事理髮行業，佢話畀對方聽︰「理髮有好多種，有同明星剪髮、同長者剪髮，有啲有錢嘅冇頭髮，都可以飛髮，收好多錢o架！」
張炳良讀書冇諗買樓
唔少與會者都關注香港青年置業難問題，運輸及房屋局局長張炳良就推說，自己讀大學時淨係喺圖書館「拾下拾下」，根本冇諗過買樓。發展局局長陳茂波亦話，年輕人要諗嘅唔係置業，而係事業，最緊要敢想敢夢，事業有發展自然有出路喎。
同樣有出席會議嘅勞工及福利局局長張建宗，先後畀人問及全民退休保障、強積金同標準工時問題，「連中三元」，不過佢嘅答案照舊係嗰三幅被。會後佢再被問及長者生活津貼問題，佢重申政府唔會讓步，希望立法會停止拉布，盡快通過撥款，以免連累長者。