政情：示威男單挑亞視百人
免費電視牌照增發問題風波不絕，與亞洲電視關係密切嘅亞洲會搞個反發牌「爛騷」後，惹起網民發起「包圍亞視行動」，亞視為咗迎戰示威群眾，尋日就如臨大敵出動近百名藝人同職員喺總部門口再做咗場爛騷。成班藝員唔單只大唱台歌、高呼「否決」口號，仲搵咗幾個俊男再次大跳「江南style」騎馬舞。不過，亞視搞咁大場大龍鳳，最終只係得一個男網民到場示威，網民連去示威都覺費事，認真悲哀。
亞視為咗反對政府發牌，真係無所不用其極，喺政府總部搞完場「關注香港未來」嘅反發牌爛騷後，仲要不斷多次重播，令通訊事務管理局收到過二千宗投訴。亞視嘅反發牌行動，令網民忍無可忍，其中一個網民曾慶光（光仔），尋日發起「包圍亞視行動」，吸引咗廿幾個記者到場採訪，但點知大家去到，先至發現參加行動嘅人數，好似亞視收視咁一樣「冇乜人支持」，只得光仔一人獨撐包圍行動。
一早收到風會有人踩場嘅亞視就有理冇理，出動咗近一百人應戰，一眾女藝人更來勢洶洶。當光仔開始同記者講嘢時，亞視執行董事盛品儒就率領一眾藝員及職員操出大門口，仲搵幾個着住粉紅色貼身「戰衣」嘅準亞姐，齊齊手舉「否決」牌，大唱佢哋首台歌，有人仲不停用個「否決」牌遮擋光仔塊面。不過，光仔亦不甘示弱，眼見亞視員工表演「江南style」，佢就即時喺閘外呼應，邊跳邊唱：「亞視執笠吧！政府發牌啦！」嘅「亞視style」還擊。
王維基否認取走亞視機密
盛品儒話，城市電訊主席王維基拍咗幾套劇就想要個免費牌照係荒謬，其家族喺亞視投資咗十幾億，王維基投資兩億幾就想同佢惡性競爭，係好唔公平，仲話王維基攞晒亞視啲商業機密資料離開。不過，王維基隨即發聲明回應盛品儒嘅指控，強調離開亞視時絕對冇帶走任何資料。其實盛品儒今次搞呢場爛騷都唔係冇收穫o架，因為咁就試得出，原來亞視仲有個忠實粉絲王維基，經常(目及)實亞視嘅最新動向，都叫做有啲成績喇。