中環出更：陳家偉龍鳳B面世
龍年將步入尾聲，但城中名人追龍Ｂ嘅熱潮停不了，前晚輪到中華廠商聯合會會董兼家得路執董陳家偉（Calvin）。佢同卓妮報喜訊話，太太Canace前晚八點幾鐘喺養和醫院生咗一對龍鳳胎，家姐Leah重五磅十三安士，細佬Zachariah就有四磅八安士重，大小平安。Calvin好雀躍，講起首次升格做爸爸，洋溢着歡欣喜悅。
Calvin話，由於事前已聽過好多已為人父嘅朋友描述產房情況，所以早就做足心理準備，就算當晚醫生臨時決定剖腹生產，佢都冇縮沙，全程陪住太太。仲帶埋音響播放音樂畀太太聽，幫太太放鬆心情，又拎埋相機、智能手機不停咁影相及拍片，直至見證一對心肝寶貝誕生，認真膽大。
仲未影全家福
生得高大威猛嘅Calvin，自然流露慈父嘅一面，唔單止連日喺醫院過夜，又勤力幫手湊ＢＢ。卓妮問佢有冇一家四口嘅幸福合照，佢笑稱，護士每隔兩小時就會推ＢＢ出來餵奶，但係兩個ＢＢ輪流推出來，所以仲未有機會一家四口大合照喎。