中環出更：K金大王設宴高朋滿座
人稱「K金大王」嘅珠寶行總裁胡楚南，其珠寶行成立四十五周年，日前喺酒店筵開四十席大宴親朋，全國人大常委范徐麗泰、中央政策組全職顧問高靜芝、行政會議成員羅范椒芬、醫管局主席胡定旭、中華電力企業發展總裁莊偉茵（Quince）、大家樂集團主席陳裕光夫婦等政商界名人到賀，而一班潮州「家己冷」亦有捧場，高朋滿座，齊齊乾杯。
當晚胡楚南一家大細齊「晒冷」，包括太太莊淑蘭、大仔智偉（Edwin）、二仔智聰（Nelson）及新抱王凱曼（Carmen），三仔智翔夫婦（Patric）以及兩位千金慧娜、慧琪（Vicky），仲有三個精靈活潑嘅孫女，兒孫滿堂。年輕時捱過窮嘅胡楚南笑言，依家家庭事業名利有齊，現階段嘅目標係知足常樂，積極助人，回饋社會。
望大仔細女快搵對象
身兼珠寶行高層嘅Carmen以三卡巨鑽耳環搶鏡，明艷照人。有幾分似歌星方力申嘅Patric，當晚就做大會司儀兼表演嘉賓，開腔獻唱時代曲，表現淡定有水準。喺紐約做牙醫嘅慧娜今次係專程返港飲呢餐，已有一女嘅佢身懷五個月囝囝，係胡家第一個男孫。胡楚南笑言，大仔同細女都未婚，希望佢哋快啲搵到另一半，咁就唔使等到公司五十周年就可以請飲喇。
原來Quince多年前已認識胡楚南，話說當年Quince喺旅遊協會工作，咁啱要喺中西區搞宣傳活動，點都要同該區嘅「地膽」打個招呼，就係時任中西區區議會主席嘅胡楚南，自此聯絡無間。直至三年前，原籍潮州嘅Quince偶然發現胡楚南都係「家己冷」，更感親切。
卓妮