社福界權威周永新教授接受專訪時，炮轟前特首曾蔭權根本「冇乜興趣扶貧」，貪曾一晌貪歡，只愛做離岸特首豪住總統套房，發其春秋大夢，這已是港人所熟悉，毋須老朽多花唇舌數臭佢咯！
周教授講開都有火，皆因貪曾冇心扶貧都算喇，佢仲要「潤」佢哋啲社福界人士係「社會主義」，如此貶低扶委會的工作及建議，認真可怒也！
貪曾禍港七年，貧窮人口有增冇減，佢一手種落嚟嘅禍根，CY睇怕有排才可撥亂反正，CY重組扶貧委員會，並將首次為港制訂官方嘅貧窮線；周永新教授特別強調新政府須長遠解決房屋問題，協助現時月入一至二萬元、無能力置業嘅「貧窮新一代」，老朽亦有同感焉。
香港社會之所以有咁多怨氣同埋噪音，前朝貪曾扶貧不力可謂最大主因。英國哲學家培根於「談叛亂與騷動」一文，明白指出叛亂的要素有二：一是貧困盛行，二是怨氣沖天。有多少人破產，就有多少人支持動亂，這一點是確定無疑的。
貪曾冇心扶貧，老朽只能套用培根的話，「有多少窮人，就有多少人支持叫囂、動亂」！「窮令智昏」，貪曾種下的禍根，搞到香港怨氣沖天，新政府推行利民紓困的措施，好似「長者生活津貼」都遇到重重阻力！如此禍及無辜，只能說這個社會不僅失去了愛的能力，也失去了就事論事的能力。面對香港的困局──相遇的不是人，而是各式各樣的噪音！老朽期待CY嘅扶貧委員會真正做出成績！