中環出更：蒙珮兒演奏場面感人
「電器大王」信興集團創辦人蒙民偉，雖然已逝世兩年，但佢對母校北京清華大學嘅貢獻一直延續落去。蒙太王蓓芬上周六喺清華「蒙民偉音樂廳」舉辦咗一場紀念音樂會，正式為音樂廳揭幕，唔少蒙叔生前嘅好友都赴京出席。蒙民偉愛女蒙珮兒（Perlie）當日即場以鋼琴彈奏父親生前最愛聽嘅《一九零五奏鳴曲》，場面感人，當大會播放蒙叔生前嘅片段時，蒙太更感觸落淚。
呢場紀念音樂會陣容鼎盛，請來樂壇知名嘅年輕小提琴家黃蒙拉及鋼琴家宋思衡粉墨登場，仲有名指揮家張藝擔任音樂總監嘅中央芭蕾舞團交響樂團傾力演出。蒙太話，先夫生前捐建呢座音樂廳，好遺憾佢未等到完工已經仙遊，依家邀請到出色嘅音樂家喺音樂廳內獻技，希望佢在天上能夠睇到，圓佢心願。Perlie就話，到呢一刻都感覺爸爸好似冇離開過咁，每當佢掛住爸爸嘅時候，就會寄情於音符，將父女親情永存心中。
前國泰航空高層黃家倫（Alan）夫婦、新世界發展執行董事紀文鳳都有出席，佢哋異口同聲話好懷念老友蒙叔。Alan話，蒙叔為人風趣又熱愛生活，唔單止賣電器耍家，仲係「古仔大王」，每次朋友聚會有佢在場，都包保冇冷場。
蒙關心廁所要乾淨
蒙民偉年輕時曾經喺清華大學修讀過航空機械系，雖然冇讀完課程，但對母校有深厚感情，先後捐建蒙民偉樓、醫學系統生物學研究所、理科館、科技大樓等。
清華大學校長陳吉寧就大爆早年蒙民偉每次到「蒙民偉樓」視察，都要參觀埋個廁所，確保乾淨清潔至安心，事關佢覺得衞生對學生嘅健康好重要。
卓妮