政情：陳曦齡孖細仔 宣傳慈善賽
近期唔少市民愛上踩單車，強身健體之餘又環保。名醫陳曦齡（Helen）去年以健靈慈善基金主席身份首辦「慈善單車馬拉松」活動，反應熱烈，今年再接再厲，拉埋細仔謝天澤（Ryan）出動做宣傳，認真母子齊心。Helen笑言自己踩單車技術一般，所以都係由Ryan代表出賽。
Helen仲向我哋報喜，大爆自己已經做咗嫲嫲，事關大仔謝天承同韓籍太太誕下龍仔，依家已有四個月大。上月中秋期間，佢同老公謝德富及Ryan去咗杭州錢塘江睇「一線潮」，當日晨早八點已去霸靚位，望穿秋水等到中午，「一線潮」曇花一現就完咗，但佢話值得一看，下次會再去杭州睇「交叉潮」！
近日美容集團發生毒針事故，Helen坦言始終都係天然美容最好，所以佢每朝起身會做柔軟體操，三餐定時定量加水果。