政情：張文光遊老撾踩中「地雷」

新一屆立法會開鑼後，建制派同泛民主派全面開戰，民主黨張文光唔做議員一身輕，佢晒命話早前同太太去咗老撾旅行，不知幾寫意。期間佢哋到訪過富有神秘色彩嘅石缸平原，嗰度曾經係越戰嘅戰場，遍布地雷，但事隔咁耐，啲地雷都已經清理咗好多，而且仲劃晒安全區添。所以張文光地雷就踩唔到喇，反而踩中另類「地雷」，搞到一腳牛屎臭崩崩，惟有急急腳返酒店沖涼。

講到「石缸平原」，張文光話幾千年前已經成個平原都滿布石缸，有人話啲石缸係用嚟裝飾，亦有人話係裝酒，甚至有人估計係用嚟葬人添，但真正用途就至今都冇人知。石缸平原曾經係越戰戰場，埋下咗唔少地雷，所以張文光同太太都要拖實小心咁行，因為「踩中地雷就真係收工」咁話喎，但想不到避得真地雷，避唔到牛屎「地雷」，難為張太要聞佢陣臭味。

第一手消息請下載on.cc東方互動iPhone/iPad/Android/Windows Phone Apps