政情：泛民鬼打鬼 劉慧卿鄭家富對罵
民主黨（白鴿黨）代主席劉慧卿同已退黨嘅鄭家富（阿富），雖然政見唔同，但話晒曾經係同門姊弟，所以阿富邀請卿姐出席佢主持嘅數碼電台節目做嘉賓。不過，兩人竟然喺節目中為政改方案議題爆發罵戰，阿富拍枱狂鬧卿姐，而卿姐就喺節目中途憤而離場，睇怕兩人今後將變成陌路人，泛民主派鬼打鬼分裂已經係死症。
為政改起爭執
話說卿姐講到白鴿黨要檢討未來工作方向，但卻被問起一○年去西環談判同支持政改方案嘅事。卿姐話，如時光倒流，佢都會喺政改方案投贊成票，因佢個人贊成溝通，而有啲市民都係因該黨嘅決定而入黨。卿姐仲話，就算港府喺○五年交政改方案上立法會，相信當時嘅白鴿黨都會支持。
講到呢度，阿富突然發火，拍晒枱咁狂鬧卿姐逾五分鐘，又話佢冇資格咁講，因為卿姐喺○五年時同白鴿黨無乜關係，依家更冇資格做該黨嘅代主席。呢個時候，卿姐火起反擊，佢邊鬧邊執手袋走：「全部都係你講晒啦，我覺得好無謂囉，參加呢啲節目好冇意思、冇興趣……呢啲叫言論自由呀？早抖啦！完全好混帳！」