政情：福建幫六區插旗
「福建幫」喺香港有一百一十萬人咁多，差唔多每七個港人就有一個福建人，福建幫一直希望喺政治影響力方面有同比增長，據聞由林樹哲領導嘅福建社團聯會正靜靜變革升級，早前仲新成立咗六個地區分會，最耐人尋味嘅係呢六個地區分會分布，基本上係同立法會五大選區看齊，佢哋嘅服務對象同覆蓋範圍，分分鐘比部分扎根地區嘅政黨更加廣闊。福建幫連番舉動既快且精密，莫非係為未來直選做好準備？
九月立法會選舉曲終人散，各大政黨陸續總結選舉經驗，其中一個重要啟示係「樁腳」嘅重要性，因為有堅實樁腳嘅政黨政團，基本上足以保送排頭位參選嘅候選人入議會，可以預見將觸發各方人士搶灘參選下屆區議會選舉，殊不知最先落手落腳參與更多地區服務嘅竟然係福建幫。
消息話，福建社團聯會早陣子新成立六個地區分會，最耐人尋味嘅係呢六個地區分會分布，基本上係同立法會五大選區看齊，唯一唔同係將香港島選區再細分為「港島東」同「港島西」，此外，另有消息指福建社團聯會計劃落戶九龍東插旗，喺當區搵地方開設地區服務處，主要為鄉里同街坊提供義診等地區服務。
許曉暉張華峰打頭陣
福建幫突然成立六個地區分會，話佢哋唔係積極擴大政治影響力都冇人信，事關佢哋一直只係搵代言人做立法會議員代為發聲，近年亦致力推薦閩籍中人入官場吸取經驗，先頭部隊首推○八年開始出任民政事務局副局長至今嘅許曉暉，最新加入議會嘅亦有金融服務界議員張華峰。
林樹哲早前仲同我哋爆料話，福建幫早前向政府推薦咗六個人做官，佢聽聞其中有兩人曾獲政府中人接觸喎，無論呢兩個人成功與否，可以預期福建幫積極擴大政治能量嘅路線只會更加堅定，未來將會有更多的閩籍政治新鮮人浮上水面，並活躍於政圈之中。