中環出更：貪曾擾民行蹤難藏
「貪曾」曾蔭權在任貪盡海陸空，卸任即避走外國後，一直好似銷聲匿迹，但事實上佢嘅鬼祟行蹤卻無所遁形，點解？因貪曾所到之處都擾民到極，之前有網民大呻貪曾所到之處百米外已有公安、保鏢、武警、救護車等「二級恐怖級戒備」，生怕人家「偵測」唔到佢嘅存在，認真擾民，行蹤敗露只能怪佢自己。
貪曾卸任離港後，傳聞有關方面要佢喺立法會選舉前「禁足」香港，避免佢搞事，但佢那矮小嘅身軀、囂張嘅表情，仲有佢拎住部單鏡反光相機扮攝影師個款，實在難逃我哋及網民雪亮嘅眼睛。近日貪曾夫婦被發現做「菠蘿雞」貪威識食，黐住電視廣播有限公司非執行董事六嬸方逸華去咗訪問杭州。
拖長咗參觀時間
根據內地傳媒報道，貪曾近日去咗杭州仲獲浙江省教育廳同杭州市教育局領導陪同，由星期日起先後去過參觀黃酒博物館、中國茶葉博物館、杭州書法學院、中國美術學院、西湖風景區嘅郭莊等。聽講郭莊係具江南特色嘅私家園林，報道形容貪曾不時拎起部單反相機係咁影相，聽到講解員介紹時仲不時頻頻點頭以示「讚許」，由於大家喺郭莊流連忘返，搞到原本半小時嘅參觀延長咗足足一個鐘頭。
西湖風景咁清幽，偏偏出咗個貪曾喺度擾民，兼搞到個地方俗晒，睇怕好多人都覺佢神憎鬼厭。貪曾之所以北望神州，因依家冇權冇勢，亂花公帑嘅日子不復再，唔一味靠黐靠貪，又點維持昔日樣樣要威嘅生活，只可惜佢貪都貪得擾民，行蹤自然敗露啦！
卓妮