政情：泛民搞寸立會 馬逢國當睇騷

尋日CY去立法會，本來一早就講咗不設答問，但人民力量陳偉業（大舊）就叫曾主席交代點解CY唔接受質詢，之後又到鐵頭仁引用舊《議事規則》，要求曾主席畀CY就發言澄清。之後鐵頭仁嘅黨友同公民黨梁家傑都有幫口，結果嘥咗成廿分鐘，CY先至可以發言。

成班泛民小學雞喺會議上就搞搞震，會後為博上鏡就排隊扑咪，坐喺會議廳後排座位嘅體育、演藝、文化及出版界馬逢國就話，見到班泛民玩嘢就好似睇緊表演咁。

喺演藝界經驗豐富嘅馬逢國話，暫時未知邊個演技最好，但大舊上次宣誓都口窒窒，應該就天分唔係咁高喎。