中環出更：羅台秦帶隊大擦陳皮美食
寶源基業主席戴澤良及太太羅台秦，早前拉隊暢遊江門五邑，見證羅台秦以母親羅任增婉名義，捐贈畀江門市第一中學興建嘅體育館命名落成儀式，順便吃喝玩樂三日。同行仲有中華廠商聯合會副會長李秀恆夫婦、徐炳光夫婦及浸會大學校長陳新滋等好友。眾人全程盡享地道陳皮美食，包括陳皮鴨、陳皮酥餅，連應節嘅月餅都加入陳皮，認真食得招積，難怪新會靚陳皮愈來愈渴市。
寶源基業係已故「光學儀器大王」黃克競所創辦，以生產相機及望遠鏡等光學儀器聞名，○二年被戴澤良夫婦收購。咪以為羅台秦係十指不沾陽春水嘅靚太，來自台灣嘅佢係物理學博士，喺科技大學創校初期，獲邀由美國返港出任科大微電子製造中心主任，協助科大設立全港首個具規模嘅半導體實驗中心，後來與香港人老公戴澤良齊創業，收購寶源基業後出任副董事長，係名副其實嘅商界女強人。
陳新滋被圍索簽名
喺台北定居嘅羅老太，雖然已高齡九十歲，但係亦專程去見證開心時刻，校方安排多達二千五百名高中生參加剪綵儀式，然後聆聽陳新滋演講，見慣大場面嘅陳校長都驚嘆話，從未試過對住咁多人演講。陳新滋係台山人，但自稱都係江門人，事關佢係中國科學院院士，江門有條院士路，路邊有埋佢嘅銅像添！此言一出，學生拍爛手掌，演講之後被包圍索取簽名，擾攘好耐至甩身，受歡迎程度媲美大明星。
嶺南多美食，今次團友們除咗享用陳皮大餐外，仲沿途買咗唔少農家擺賣嘅鵝蛋及木瓜，為晚飯添加農家風味佳餚。此行最回味嘅係用荔枝柴燒烤嘅古井燒鵝，連唔食鵝嘅羅台秦都食咗幾件，勁讚好好味。