政情:張建宗前後門撲火

新一屆立法會復會在即,行政立法攻防戰再度上演,財委會喺本月底審議俗稱特惠生果金嘅二千二百元長者生活津貼,立即就要考驗政府的建制朋友夠唔夠朋友,因為大家趁高興,已逐漸演變成「特惠生果金開價戰」,其中連民建聯都要提出優化方案。

今次撥款,除咗泛民主派同工聯會要求撤回資產審查,最新加入戰團嘅係民建聯同自由黨,佢哋不約而同提出把資產限額提高,其中自由黨黨內核心人士事前張揚,唔會接受原封不動方案,要求「特惠生果金」資產限額「最好加啲」,港府前門後門都失火而回,睇怕唔優化或微調方案難望獲得較多支持。

料泛民全投反對票

政務司司長林鄭月娥早前主動出擊放話,不點名批評有人藉資產審查問題,阻政府推出「特惠生果金」,原以為「出口術」會較易取得七十名候任議員,特別係四十多名建制派議員嘅支持,點知人算不如天算,據聞唔少候任議員都視「特惠生果金」為「試金石」展現政治能量,爭向港府提出「開天索價,落地還錢」嘅建議。

就以泛民主派為例,工黨正游說泛民議員投反對票,逼政府撤銷資產審查,預計泛民廿七票會全數投下反對票。另一邊廂,建制派喺呢個議題上亦非「善男信女」,工聯會「票后」陳婉嫻早前提出,「特惠生果金」嘅申請應與生果金睇齊,換言之七十歲以上長者毋須資產申報,工聯會六票睇怕都係凍過水。

民記亦提優化建議

不過最令人意外嘅係一向力撐政府嘅民建聯加入戰團,佢哋提出兩個優化建議,第一,六十五歲或以上長者申領生果金免資產審查,第二,特惠生果金資產限額要由十八萬六千元提高至三十萬元,不過該黨主席譚耀宗未有明言,倘政府未有接納呢兩個優化建議,會否支持或反對原封不動嘅方案。

話時話,距離財委會審議「特惠生果金」仲有差不多一個月,呢場「特惠生果金開價戰」已經如此激烈,睇怕勞工及福利局局長張建宗要重新審時度勢,否則新政府首次同立法會交手定必會焦頭爛額,日後施政只會更加寸步難行。

第一手消息請下載on.cc東方互動iPhone/iPad/Android/Windows Phone Apps