政情:皇仁仔立會最架勢

新一屆立法會唔單止建制派同泛民主派板塊大執位,就連傳統名校喺立法會內嘅勢力亦有所改變。皇仁書院(皇仁仔)一躍成為立法會內最大「黨」,一共有五位校友,包括醫學界梁家騮、會計界梁繼昌、民主黨胡志偉及地產建造界石禮謙等。左派學校亦有抬頭迹象,香島中學合共有三名校友喺立法會,分別係進出口界嘅民建聯黃定光、工聯會黃國健及金融界吳亮星,勢力不容忽視。

本來皇仁仔喺今屆立法會未算最大勢力,只得三名校友,但新一屆嘅實力突然上升,增加到五名校友。緊接排第二位就係兩間傳統名校拔萃男書院及九龍華仁書院,兩間學校各佔三名議員。其中男拔校友位位富貴,包括新民黨田北辰兩兄弟,仲有飲食界嘅自由黨張宇人。至於九華嘅政治光譜就闊好多喇,由民主黨涂謹申、公民黨梁家傑、到空降九龍東當選嘅謝偉俊,證明讀咩中學同政治取態真係冇乜關係。

反觀本身有四個議員嘅聖保羅書院,今屆就大出血,竟然輸咗三個,包括民建聯(民記)劉江華、民主黨李永達及建築測量及都市規劃界劉秀成,幸好民記嘅曾鈺成成功連任,再加上重返議會嘅工黨張超雄,令聖保羅可以保持有兩位校友。另外,香港華仁書院都有兩位校友議員,分別係資訊科技界莫乃光及勞工界嘅工聯會郭偉強。同樣係名校嘅英皇書院校友就係社福界張國柱;喇沙書院就只有法律界郭榮鏗做代表。

左派學校政治人才崛起

講完傳統名校,不得不提勢力不斷上升嘅左派名校,第一位係有三位校友嘅香島中學,分別有民記黃定光、工聯會黃國健及金融界嘅中銀高層吳亮星;漢華中學就有陳克勤等。而另一傳統左派學校培僑中學,今屆校友就有金融服務界張華峰,計埋來自勞工子弟學校嘅王國興,總共有七人來自左派學校系統,證明左派學校多年來培育咗唔少政治人才,話唔定下一屆立法會有更多校友加入都未定。

第一手消息請下載on.cc東方互動iPhone/iPad/Android/Windows Phone Apps