政情：七十歲靳埭強 展覽慶豐年
人生七十古來稀，但有好嘅生活態度，七十歲依然可以充滿創意。好似有「香港設計之父」之稱嘅靳埭強（靳叔），已踏入從心所欲之年，尋日就喺香港中央圖書館舉辦《靳埭強七十豐年展》，依然活力十足。豐年展分為「墨化」、「脈化」同「物化」三個不同展覽，除咗靳叔展出四十多年來最多人欣賞嘅作品外，仲匯集三十五位來自港澳、內地同台灣嘅設計師作品同大家分享。
好多人都話藝術家有脾氣，但靳叔嘅囡囡靳民詩就話爸爸冇呢個問題，而且向來好開明，好似佢中三揀科，爸爸畀佢自由選擇，搞到佢喊咗出嚟。靳叔當年繼承爸爸衣鉢做裁縫，後來先改做平面設計，佢覺得讓年輕人自由發展最好，好似佢到依家都仲有好多創作靈感，全因為能夠選擇自己鍾意做嘅嘢。與靳叔相識四十多年嘅著名設計師陳幼堅亦有捧場，佢覺得設計注重品質最重要，唔會只跟隨客人意思而隨波逐流。
