KK話，前日朝早突然間又屙又嘔，搞到成身冇晒力、身體仲脫水添，佢見勢色唔對，即時走去求醫，醫生話佢受感染，二話不說幫佢打咗支針，尋日已經好番好多，但仍然有少少發燒，講嘢都有氣冇力。佢話唔知因乜事中招，笑言可能同選舉太辛苦有關喎。
話同選舉有關，其實不無道理，工聯會近年嘅立法會議員身體總係有啲唔妥，但好幸運，次次都可以大步檻過。除咗KK外，喺香港島直選勝出嘅王國興之前整親條頸、新界西嘅麥美娟○八年選立法會時亦整親腳要做手術，到去年區議會選舉都有手尾跟，據聞佢近日都病咗，應晒「天將降大任於斯人，必先勞其筋骨」嘅古諺。