政情：環局「蕙星配」 學者讚專業
前立法局議員陸恭蕙最近成功入閘成為環境局副局長，同局長黃錦星拍住上，唔少環保界人士都頻頻發聲，話對「蕙星配」好有信心，當中包括研究海洋廢物超過卅年、公開大學科技科學院院長何建宗。佢話正副局長多年來喺各類型嘅環保議題都好活躍，亦有實事實幹嘅專業態度，言談間仲寸爆前任正副局長邱騰華同潘潔唔夠專業、做得唔夠好。
何教授之所以力撐環境局正副局長人選嘅配搭，係因為佢睇好黃錦星同陸恭蕙實事實幹嘅專業態度，絕對有能力推出務實政策，一定唔會令市民失望喎。佢話：「黃錦星有環保建築工作經驗，陸恭蕙做立法局議員嗰陣就主打空氣同水質問題，相信佢哋可以相輔相成，處理好空氣質素指標、廢物管理、焚化爐等重要議題。」
對邱騰華潘潔表現無奈
對於前任環境局嘅表現，何教授就好無奈話，上屆只係推出咗停車熄匙及膠袋徵稅兩個主要政策，對環保幫助唔算好大，而且好多環保法例過晒時都冇人理，的確仲有好大檢討空間。何教授呢番說話，如果畀政治能力及環保知識都偏低嘅邱騰華同潘潔聽到，唔知兩位會唔會覺得有少少慚愧呢？