政情：爭財會主席星爺鬥卿姐
泛民主派近年屢次喺立法會財務委員會「拉布」阻延撥款，建制派一直對民主黨劉慧卿出任財委會主席「把關」表現好有意見，密謀派人搶番呢個位撥亂反正。據聞建制派近日正式出招，有人推舉金融界吳亮星（星爺）或自由黨張宇人硬撼卿姐，暫時以星爺嘅呼聲較高，但有知情人士提醒，建制派撐星爺或會觸怒自由黨倒戈同泛民合作支持卿姐，分分鐘令星爺成為卿姐嘅手下敗將。
新一屆立法會下月十日開鑼，隨後會互選立法會事務委員會正副主席。按照慣例，建制同泛民事前都會協調正副主席人選，但對於個別兵家必爭嘅內務委員會及財委會正副主席，好多時建制同泛民都會各不相讓。
建制游離票或支持卿姐
事實上，建制派內部亦正醞釀重奪失落多時嘅財委會主席，主因係近年泛民屢次喺財委會重複提問，搞到開會節數不斷增加，建制派想打破呢個困局，唯一辦法就係重奪財委會主席呢個有「把關」實權嘅寶座。據聞建制派內部初步推舉兩個人選挑戰卿姐，包括重返議會嘅星爺及曾捲入最低工資風波嘅張宇人，但當中以星爺呼聲較高，主因係星爺形象較為溫和，較易取得各建制黨派支持。不過，有心水清嘅人提醒，要慎防自由黨因張宇人無緣代表建制派上陣鬥卿姐，倒戈相向支持卿姐，又或者該黨要張宇人落場同星爺爭位，變相分薄票源令卿姐漁人得利；加上歷年來都有建制游離票支持卿姐，因而令選舉存在好大變數。
內會主席梁君彥暫秤先
如果建制派今次真係因爆內鬥而輸財委會主席，搞到卿姐可以喺審批撥款時繼續疑似「放水」配合泛民議員，邊個要負全責，相信大家心裏有數。此外，內會主席嘅人選亦逐步明朗化，最新消息指經濟動力林健鋒同梁君彥兩個內會主席熱門人選中，以梁君彥嘅機會較為佔先；至於林健鋒能否喺政圈再上一層樓，有傳要視乎經濟動力能否招攬更多獨立議員加入，但有冇人肯加入就另一回事喇。