中環出更：一支公唐唐歎凍咖啡
唔少前高官離開咗「熱廚房」之後，都過住啲優哉游哉嘅生活，好似前政務司司長唐英年咁，自從喺特首選舉中落敗後，一於疊埋心水退隱歎世界，直至立法會選舉投票日先至現身，見佢發福不少。前日下午四點左右，卓妮見唐唐一支公現身中環太子大廈，一手拎紙袋，一邊走入COVA買番杯冰凍嘅咖啡解渴，真係識歎。
肚腩呼之欲出
當日唐唐着住格仔短袖恤衫配西褲，肚腩呼之欲出，佢行入COVA買咖啡，店員好熱情咁同佢打招呼，睇嚟買慣買熟。卓妮都上前同唐唐打招呼，佢話依家冇以前做官咁忙，但仍然要忙自己啲私人事務。問佢之前投票畀嗰個立法會候選人、有冇當選？唐唐故作神秘話：「投完票點會話畀人聽o架？」
唐唐講完後保持笑容咁行過隔籬歷山大廈地下，耐心等待私人座駕接載，期間仲笑笑口抬頭望上企喺天橋嘅卓妮，情景都幾搞笑。