政情：中環出更：施榮懷帶隊遊內蒙騰騰震
充滿草原野外風情嘅內蒙古，近年成為熱門旅遊勝地，香港廠商聯合會會長施榮懷（Irons）日前帶隊去考察五日，一嘗喺蒙古包食手抓羊肉嘅滋味。內蒙早晚溫差大，晚間一度跌至攝氏十度，Irons同仔女帶唔夠衫，凍到騰騰震，最後只好將僅有嘅風褸、西裝全部讓晒畀仔女着，佢笑言：「只差未將睡袍着埋去街！」
今次廠商會一行有廿多人出發去內蒙，除Irons一家五口外，仲有副會長吳清煥、「糖薑大王」余達之孫女余皓媛等，唔少團友都係初次遊內蒙，但Irons就熟晒地頭，事關佢二十年前已喺當地設廠生產cashmere羊絨。今次重遊舊地，眼見當地人因為開採煤礦、稀土等天然資源發晒達，如今嘅內蒙人分分鐘有錢過香港人。
內蒙唯一不變係浩瀚無際嘅大草原，Irons帶隊參觀恍如綠色巨地氈嘅「呼倫貝爾草原」及「成吉思汗陵」等，團友都驚嘆內蒙草原又大又冇污染，發展綠色食品生意潛力無限。其實有廠商會會員已喺內蒙投資種植辣椒，睇嚟呢門生意有得諗喎。
多款羊菜式好滋味
講到食，內蒙以食牛、羊為主，但Irons太太因為戒吃牛、羊，幾乎冇啖好食，惟有餐餐食魚，反而Irons就讚當地羊肉頂呱呱，款式多到嚇一跳，好似「羊雜湯」、「羊血灌羊腸」等，呢類食品喺香港好少有得食，團友起初只係敢齋睇，但最後都膽粗粗一試，點知愈食愈滋味。
卓妮