本報日前踢爆勞工顧問委員會近半年淨係開過一次會，被批評拖慢勞工政策立法。勞工及福利局局長張建宗（小肥張）尋日出席活動後仍死撐話，勞顧會開會嘅日期係好靈活嘅，大家最近有錯覺覺得佢哋唔開會，係因為佢哋都要搜集資料，仲話一定要有嘢討論開會先有意思喎。小肥張又話，勞顧會喺第四季會處理男士侍產假同標準工時問題，咁係咪暗示攤抖咗咁耐嘅勞顧會最快都仲要過埋個暑假先再開會呢？
